Cun ina victoria da 3:1 encunter l’equipa da Cuera 2 cuntonscha Schluein Glion sco era egl onn vargau il final dil Cup grischun e sa aschia pia sperar da defender il tetel recaltgau il 2025. Il final vegn a haver liug d’Anceinza, ils 14 da matg 2026, a Cuera sin la Obere Au. Adversari ei u il club da ballapei da Celerina ni Valposchiavo Calcio che dattan il secund miezfinal proximamein.

Aschi baul sco aunc strusch inagada ha la sonda vargada la sesiun da ballapei entschiet a Crap Gries avon ina biala roscha d’aspectaturas ed aspectaturs, la quala ha fatg frunt al ferm e criu vent che ha buffau duront il giug entir e purtau plievgia e sin la fin schizun scrottas da neiv. Ils giugadurs d‘omisduas equipas han mussau che moviment ei in bien remiedi encunter la ferdaglia cun procurar per in’entschatta animada. Gia en la sisavla minuta eis ei numnadamein gartegiau als hops da Cuera 2 d’ir en avantatg entras in gol da Davide Rosafio che ha astgau concluder in’attacca sur la vart seniastra cun sittar la balla cun empau cletg en la reit. Quei avantatg ha denton buca teniu gitg. Mo ina minuta pli tard ha Lars Zala sbagliau la mira mo per pauc ed aunc ina minuta pli tard ei gia l’egalisaziun gartegiada. In siet da cantun ei igl emprem vegnius rebattius dalla defensiun, ina secunda flanca naven dalla vart dretga ha il goli denton buca saviu spedir naven, aschia che Aron Büchler ha sittau la balla a moda spectaculara cun ina „bicicletta“ en gol.

Era il secund gol per Schluein Glion ei curdaus suenter in siet da cantun. Ruben Rechenbach ha sittau quella gada la balla ferm e miez ault avon il gol da Cuera 2, nua che Lars Zala ha controllau ella cul pèz e sittau en la reit. Silsuenter ei il giug secalmaus empau ed omisduas equipas han buca scaffiu pli grondas caschuns da marcar entochen tier il té da pausa, il qual ha per inagada buca saviu esser caulds avunda.

Era en la secunda mesadad eis ei plitost iu vess ad omisduas equipas da baghegiar si il giug. Quei denton buca pervia dil pastget, il qual splendurava aunc buca en in aschi frestg vert sco normalmein a Crap Gries, mobein plitost pervia da mancos persunals dils giugadurs, ils quals capetan beinbugen suenter la pausa d’unviern. A Schluein Glion eis ei lu tuttina gartegiau da decider il giug en la 70avla minuta cun ina biala acziun che ha giu siu origin sin la vart seniastra. Ruben Rechenbach ei vegnius lantschaus en l’ala e siu pass travers ha Lars Caduff menau directamein el cantun bass.

US Schluein Glion – Cuera 97 2 3:1 (2:1)

Schluein Glion: Mattia Büchler; Laurin Zala (65. Walter), Cavegn, Aron Büchler, Coray; Arpagaus (46. Paulin), Rechenbach (80. Weishaupt), Ronny Casutt; Deplazes, Caduff (72. Rafael Manetsch), Lars Zala.

Cuera 97 2: Suznjevic; Bogdanovic, Oertli, Collenberg, Detommaso; Manojlovic, Teixeira (4. Almeida), Thayapararajah (58. Mahari), Neuhaus (87. Lanfranchi); Iwadi (Sousa), Rosafio.

Remarcas: Cartas mellnas: 20. Arpagaus (fou). – Schluein Glion senza Gianluca Casutt, Wellinger (blessai, reconvalescents), Afzali, Remy Manetsch (absents). – 47. siet da cantun sin la traversa Schluein (Deplazes). – Corners: 9:1.