Per la secunda gada en quest campiunadi ha l’equipa da Schluein Glion spiars in giug e per la secunda gada ei l‘equipa da Mels 1a stada igl adversari. E puspei havess la terrada buca stuiu esser. In culp liber ed in penalti han denton vulviu il giug entuorn la siatontavla minuta.

Igl emprem giug da campiunadi en la runda da primavera ha entschiet ideal per Schluein Glion. Gia en la tiarza minuta eis ei gartegiau a Ruben Rechenbach da marcar cun igl emprem siet igl emprem gol. El ei vegnius survius da Lars Caduff  cun in pass exact naven dalla vart seniastra. Silsuenter han las numerusas aspectaturas ed ils numerus aspectaturs viu plitost in giug mudest cun dabia interrupziuns muort fouls, pass falli e malcapientschas, in tipic giug dall’entschatta primavera. La proxima gronda occasiun da sittar in gol ha puspei Schluein Glion giu en la 27avla minuta. Rafael Deplazes ha denton tuccau cun siu siet naven dalla lingia da sedisch mo la traversa. Mels ha giu sia pli gronda occasiun, cura che las empremas 45 minutas eran gia vargadas e tuts spetgavan sin il schul da pausa digl arbiter. Il siet cul tgau da Veton Aliji ord cuorta distanza ei denton ius sur la traversa ora.

Era suenter pausa ei il giug buca vegnius megliers. En la 68avla eis ei tuttina reussiu als hospitonts d’egalisar. Igl abiter ha schulau in foul e Manuel Mullis ha plazzau siu siet da bien vegn meters sper il mir vi el cantun bass, nua ch’igl ei buca reussiu a Flurin Capaul da frenar la balla, la quala ei el davos mument aunc rebattida dil terren maluliv. Quei gol ha dau anim alla equipa da casa che ha ussa encuretg da decider il giug. E quei ei cuort pli tard era reussiu. In attaccader da Mels 1a ei vegnius tuccaus agl ur dalla da sedisch vid il pei ed ius a tiara. Immediat ha igl arbiter schulau e mussau sil punct da penalti. Robin Lymann ha surpriu la responsabladad e marcau cun in siet segir el cantun bass il gol dalla victoria. Era sche Schluein Glion ha aunc empruau tut da silmeins egalisar.

FC Mels 1a – US Schluein Glion 2:1 (0:1)

Tiergarten. – 200 aspectaturs/-as. – AR: Vrenezi

Gols: 3. Rechenbach 0:1, 68. Mullis 1:1, 73. Lymann 2:1 p..

Mels 1a: Rissi; Mullis, Büsser, Lymann, Bleisch; Züst, Kohler (83. Tschirky), Aliji, Bartholet, Mehmetaj (67. Kobler), Ackermann (61. Schlegel).

Schluein Glion: Capaul; Laurin Zala, Coray, Aron Büchler, Walter (81. Cavegn); Arpagaus (46. Paulin), Rechenbach, Ronny Casutt; Deplazes, Caduff, Lars Zala (62.

Remarcas: Cartas mellnas: 33. Büchler (foul), 36. Kohler (reclamar), 70. Bleisch (foul), 80. Caduff (reclamar), 83. Mullis (malsportadad), 90. + 1. Aliji (malsportadad) – Schluein Glion senza Gianluca Casutt, Vinzens, Wellinger (blessai, reconvalescents), Remy Manetsch (absents). – 27. siet en la traversa Schluein (Deplazes), 54. siet da cantun sin la traversa Schluein (Deplazes). – Corners: 5:4.