Cun ina clar megliera prestaziun che la jamna vargada ha Schluein Glion recaltgau ulteriurs treis puncts e francau siu plaz al tgau dalla tabella. Mo l’equipa da Cuera 2 ha buca fatg ei sempel alla equipa dalla Surselva!

Duas gadas ha l’equipa da casa numnadamein egalisau il resultat enteifer mo paucas minutas suenter che Schluein Glion haveva giu sittau ses emprems dus gols. Aschia ein tut ils quater gols ch’ein curdai en l’emprema mesadad vegni sittai enteifer mo nov minutas denter la 32- e 40avla minuta. Igl emprem gol ha Lars Caduff sittau. En dus han ils attaccaders da Schluein Glion fatg pressiun sin ils defensurs da Cuera 2 ed il davos um ha piars la balla, aschia che Lars Caduff ha saviu ir persuls encunter gol ed arver il score. Tschun minutas pli tard ha Kebron Araya plazzau in culp liber da 20 meters distanza sper il mir vi el cantun bass seniester ed egalisau. Mo ina minuta pli tard ha il giuven Timo Cavegn sittau siu emprem gol per l’equipa da Schluein Glion. El ha surpiu in pass da Lars Caduff en la zona da puniziun e plazzau cun in siet dalla part exteriura dil pei la balla el cantun ault. Duas minutas pli tard ha igl arbiter puspei schulau in foul encunter Schluein Glion. La balla ei vegnida sittada da bien trenta meters ault en la zona da puniziun nua che Zoran Manojlovic ha spediu ella cul tgau en la reit. Cuort avon la pausa ha Sattar Afzali giu ina gronda pusseivladad da puspei sittar Schluein Glion en avantatg. Siu siet direct sin ina flanca da dretg ei denton ius sur gol ora.

La secunda mesadad ha entschiet plitost empau pli ruasseivel; forsa pervia dalla gronda calira che regeva sin il plaz artifical all’Obere Au? Schluein Glion ha vinavon empruau da crear occasiuns da marcar, in ulteriur gol ha denton buca vuliu curdar, era sche duas, treis occasiuns ein stadas excellentas. L’equipa da Cuera 2 ha rispundiu cun dabia direzia ed aschia era recaltgau entginas cartas mellnas. Cun cunterattaccas han ils giugadurs dalla capitala vuliu vegnir all’success, quei ei denton gartegiau mo a mesas. Aschia ha la finala ina cunterattacca da Schluein Glion purtau la victoria als hosps. Suenter in corner da Cuera 2 ei la balla vegnida purtada spert anavon e la finala ha Rafael Deplazes spediu ella sur la lingia da gol en e procurau per la victoria.

Cuera 97 2 – US Schluein Glion 2:3 (2:2)

Obere-Au. – 115 Zuschauer/-innen. – SR: Tomasi

Gols: 32. Caduff 0:1, 37. Araya 1:1, 38. Cavegn 1:2, 40. Manojlovic 2:2, 86. Deplazes 2:3.

Cuera 97 2: Suznjevic; Anghileri, Oertli, Collenberg; Manojlovic, Almeida (65. Lanfranchi), Araya (46. Waser), Teixeira,Neuhaus (82. Gasem); Sousa, Rosafio (59. Ranieri).

Schluein Glion: Mattia Büchler; Laurin Zala, Coray, Ronny Casutt, Walter (63. Weishaupt); Arpagaus, Cavegn (69. Rechenbach), Afzali, Deplazes; Caduff, Lars Zala (57. Rafael Manetsch).

Remarcas: Cartas mellnas: 65. Neuhaus (foul), 73. Sousa (foul), 79. Meliti (trenader Cuera, reclamar), 81. Oertle (foul). – Carta cotschna: 89. Rosafio (naven dil baun da reserva, reclamar) – Schluein Ilanz senza  Gianluca Casutt, Paulin, Vinzens (blessai, reconvalescents), Remy Manetsch (absents). – Corners: 3:9.