Avon ina biala culissa d‘aspectaturas ed aspectaturs el stadiun da ballapei sin la Obere Au a Cuera ein Valposchiavo Calcio e l’US Schluein Glion semiserai d’Anceinza el final dil Cup grischun. En in giug spert ed intensiv ha l’equipa da Valposchiavo Calcio decidiu la partida suenter bien in‘ura cun dus gols enteifer tschun minutas.

Il giug denter Valposchiavo Calcio dalla secunda ligia regiunala e Schluein Glion che ha giu gudignau igl onn vargau il Cup grischun entscheiva cun bia tempo da duas equipas che enqueran l’offensiva. Gia en la tschunavla minuta gartegia ei als Sursilvans dad ir en avantatg entras Lars Caduff che vegn lantschaus da Rafael Deplazes cun in pass en la gassa. Igl avantatg cuozza denton mo in cuort mument. Strusch ina minuta pli tard sa Nicolo Pola egalisar per Valposchiavo. Suenter ina malcapientscha en la defensiun da Schluein Glion vegn el survius da Alberto Moroni e sa ord cuorta distanza sittar la balla en la reit. Suenter quella entschatta furiusa han las aspectaturas ed ils aspectaturs astgau contemplar in giug fetg animau ed uliv. Omisduas equipas han giu entginas caschuns da marcar in secund gol, mo quei ei buca reussiu avon la pausa. La megliera occasiun per Schluein Glion ha Lars Caduff giu en l’endischavla minuta. Siu siet ei denton filaus mo per pauc sur la traversa ora. La megliera occasiun per l’equipa dalla vallada dil Sid ha Alberto Moroni giu cuort avon la pausa. El ha astgau cuorer tut persuls encunter il goli suenter in sbagl d’in defensur, siu siet ha Mattia Büchler denton teniu cun ina biala parada.

En la secunda mesadad ei il giug vegnius empau pli pauc attractivs. Il tempo ei tschessaus, quei ch’ei bunamein stau da spitgar suenter la fetg intensiva emprema mesadad sin il grond plaz dall’Obere Au. Suenter bien in‘ura ha la defensiun da Schluein Glion reteniu Nicolo Pola en la zona da puniziun cun in foul, il qual il rutinau attaccader ha provocau cun tut sia rafinessa. Mattia Vanotti ha aschia astgau sittar Valposchiavo Calcio naven dil punct da penalti cun in siet plazzau en avantatg. E cuort pli tard eis ei aunc vegniu meglier per l’equipa dalla secunda ligia. Per ina gada ha la defensiun da Schluein Glion buca saviu frenar Mattia Cathieni, il qual ei bein enconuschents per ses siets cul pei seniester naven dalla vart dretga, e gia ei la balla setschentada per la tiarza gada en la reit davos Mattia Büchler. Ussa ha Schluein Glion stuiu encurir pli fetg l’offensiva per forsa aunc saver volver il giug. Il trenader Mirco Zala ha dau il signal da far quei cun midar en treis novs giugadurs offensivs. Grondas  caschuns da marcar ha l’equipa dalla Surselva denton buca saviu crear pli, quei ha la defensiun da Valposchiavo buca lubiu. Era cheu ei la rutina da quella equipa semussada. Ils defensurs che dattan gia plirs onns ensemen ed enconuschan in l’auter bein, san nua star e vegnan susteni bein dils giugadurs da miez. Enstagl d’in secund gol per Schluein Glion, il qual havess purtau aunc inagada empau tensiun el giug, ha Mattia Cathieni sittau cuort avon la fin siu secund gol persunal e quei puspei cun in siet cul pei seniester naven dalla vart dretga.

Schluein Glion ha sur la gronda part dil giug mussau encunter in’equipa che dat bal en ina ligia pli ault ina buna prestaziun. Bien in’ura han las aspectaturas ed aspectaurs buca viu gronda differenza denter las duas equipas. La finala ha la rutina da Valposchiavo Calcio tuttina fatg la differenza e schau gudignar il giug meritadamein.

Valposchiavo Calcio – US Schluein Glion 4:1 (1:1)

Obere Au. – 1000 aspectaturs. – AR: Schüepp

Gols: 5. 0:1 Caduff, 6. Pola 1:1, 62. Vanotti 2:1 pen., 67. Cathieni 3:1, 89. Cathieni 4:1.

Valposchiavo Calcio: Marocco (90. + 4. Cirolo); Rossi, Massimiliano Fiorina, Cristiano, Cortesi; Merlo, Vanotti, Bormolini; Cathieni, Pola (90. Fanconi), Moroni.

Schluein Glion: Mattia Büchler; Laurin Zala (86. Weishaupt), Capeder (46. Cavegn), Coray, Walter (73. Vinzens); Ronny Casutt, Arpagaus, Afzali (73. Rafael Manetsch), Deplazes; Lars Zala (73. Rechenbach), Caduff.

Remarcas: Cartas mellnas: 30. Vanotti (foul), 57. Cortesi (foul), 68. Pola (foul). – Schluein Glion senza Gianluca Casutt, Remy Manetsch, Paulin (blessai/reconvalescents), Gienal, Schmid (absents). – Corners: 4:4.