Mo treis gis suenter la terrada el final dil Cup grischun encunter Valposchiavo Calcio ei Schluein Glion semiseraus sil plaz sportiv Exi agl ur dil lag rivaun encunter il club da ballapei da Walenstadt. E l’equipa sursilvana ha mussau ina oreifra prestaziun, stauncladad ei stau negin tema. Ruasseivel e suveran ha l’equipa gudignau 3:1 ed aschia francau siu plaz alla testa dalla tabella.

Tgi che ha tertgau che l’equipa da Schluein Glion savessi esser la dumengia suentermiezgi empau stauncla suenter il giug dalla gievgia vargada ha astgau constatar ch’ils giugadurs ein stai naven dall’entschatta allerts ed han immediat priu il giug enta maun. Cun pazienzia e precauziun per la balla ha l’equipa fatg il giug e strusch schau als indigens la pusseivladad da sez vegnir activs en l’offensiva. Avon ch’igl ei gartegiau a Schluein Glion dad ir en avantatg ha ei denton cuzzau in mument. En la 28avla minuta eis ei lu denton stau aschi lunsch. Rafael Deplazes ha menau la balla anavon e surschau ella a Lars Caduff, lez ha lantschau Sattar Afzali ch’era plazzaus sin la vart seniastra agl ur dalla zona da puniziun. Cun in bellezia siet el cantun ault dretg ha igl attaccader battiu il goli indigen e sittau igl emprem gol. Ussa ha l’equipa da casa stuiu far empau dapli per l’offensiva, quei ei denton gartegiau mo a mesas. Auter che cun ballas liungas ni culps liber ord ina pulita distanza eis ella strusch vegnida da s’avischinar al gol dils hosps. E tuttina ei cuort avon pausa l’egalisaziun dil resultat gartegiada. Ina flanca suenter in culp liber ha la defensiun da Schluein Glion buca saviu deliberar en uorden e suenter dus siets rebatti ei la balla curdada a Raffaele Tassone avon ils peis ed ord cuorta distanza ha el dumignau ella en gol.

Suenter il té ha Schluein Glion alzau empau la cadenza ed aschia decidiu il giug cun dus gols aunc avon la fin dall’emprema ura da giug. Il secund gol ha Ruben Rechenbach sittau sin pass da Lars Zala. Tier quei gol ha il davos um da Walenstadt buca gest fatg la megliera figura, el ha stuiu schar passar il siet ord bien diesch meters denter la detta en la reit. Siat minutas pli tard ha Lars Zala mussau ch’el ha tuttina aunc buca emblidau diltut co ins setta gols. El ei vegnius mess en scena sin la vart dretga ed ha ord pulit gronda distanza battiu il goli cun in siet ferm e precis en il cantun ault seniester. Tier quei resultat eis ei lu restau entochen alla fin dil giug. L’equipa da casa ha giu en l’entira secunda mesadad strusch ina buna caschun da marcar. Schluein Glion ha aunc giu in per pusseivladads per alzar il resultat. Quei ei denton buca gartegiau era perquei che Lars Caduff ha cun in culp liber tuc mo la petga e perquei ch’il goli indigen ha teniu cun bravura in siet ord cuorta distanza da Timo Cavegn.

FC Walenstadt – US Schluein Glion 1:3 (1:1)

Exi. – 120 aspectaturs/-as. – AR: Kastrati

Gols: 28. Afzali 0:1, 45. Tassone 1:1, 49. Rechenbach 1:2, 56. Lars Zala 1:3.

Walenstadt: Jäger; Nicola Joop, Reinhardt (77. Gervasoni), Pfiffner, Patrick Loop; Tassone, Karisik (54. Pawlik), Cecchini, D’Agostino; Gubser (71. Tomaselli), Qehaja.

Schluein Glion: Mattia Büchler; Laurin Zala (88. Weishaupt), Capeder, Coray, Aron Büchler (46. Walter); Casutt (46. Rechenbach), Arpagaus, Deplazes (80. Vinzens), Afzali (84. Cavegn), Caduff (89. Rafael Manetsch), Lars Zala.

Remarcas: Cartas mellnas: 20. Reinhardt (foul), 21. Aron Büchler (Foul), 68. Gubser (foul), 81. Arpagaus (distanza). – Schluein Glion senza Gianluca Casutt, Remy Manetsch, Paulin (blessai, reconvalescents). – 70. siet en la petga Schluein (Caduff). – Corners: 2:3.