Roman Josi ha duvrau dacuort mo 4 minutas e 45 secundas per sittar in „hattrick“ encunter la Ungaria a caschun dil campiunadi mundial da hockey che ha dil present liug en Svizra ed aschia cuntonschiu in record mundial. Mo bien ina minuta pli gitg ha Lars Caduff duvrau la sonda vargada per sittar ses emprems treis gols encunter Triesenberg. Pia negin record mundial, persuenter ha el aunc sittau dus ulteriurs gols e procurau per ina clara victoria da Schluein Glion.

Sil plaz cuort e stretg ha l’equipa da Triesenberg entschiet cun bia slonsch e duvrau mo tschun minutas per ir cun in gol en avantatg. Suenter in siet da cantun ha il goli da Schluein buca saviu bloccar la balla, aschia che Sebastian Beck ha saviu profitar e realisar ord cuorta distanza. Quei gol ha destadau l’equipa da Schluein Glion e cunzun Lars Caduff, il caposettagols dall’equipa dils davos onns. Bein lantschaus da ses congiugadurs ha el mussau naven dalla 16avla minuta sias capacitads da marcar. Igl emprem gol ha el sittau propi alla moda d’in attaccader central, in fin pass da Ruben Rechenbach ha el surpriu, ei marschaus sper ils defensurs ora e battiu il goli cun in siet segir. Il secund gol ha el sittau sin in pass da Rafael Deplazes, cun tutta forza ha el sittau la balla cul pei seniester el tetg dalla reit. Tier siu tierz gol enteifer mo cuort temps ha el profitau d’ina balla rebattida dil goli suenter in siet da Lars Zala. Era per il quart gol ei Lars Caduff staus responsabels. Quella gada eis el vegnius lantschaus da Ruben Rechenbach sin la vart dretga, ei mitschaus da siu defensur e battiu il goli cun in siet precis el cantun bass cul pei dretg.

Suenter pausa ei il giug da gronda calira lu vegnius empau pli ruasseivels. Triesenberg ha en las empremas minutas empruau da forsa aunc vegnir da volver il giug. Quei ha la defensiun da Schluein Glion denton buca lubiu. Aschia che Lars Caduff ha cun siu tschunavel gol en la 58avla minuta decidiu il giug definitivamein. Ussa restan aunc dus giugs da dar el campiunadi 2025/26 e Schluein Glion meina la tabella dalla gruppa cun sis puncts avantatg. In punct en ils dus davos giugs e la giuvna equipa cuntonscha la promoziun. Ins astga semiar!

FC Triesenberg – US Schluein Glion 1:5 (1:4)

Leitawies. – 164 aspectaturs. – AR: Georgis

Gols: 5. Beck  1:0, 16. Caduff 1:1, 20. Caduff 1:2, 23. Caduff 1:3, 36. Caduff 1:4, 58. Caduff 1:5.

Triesenberg: Dosch; Gritsch (46. Hanselmann), Büchel (81. Sommerauer), Viegas Soares; Beck, Marques (27. Meier), Ospelt, Gassner, Schreiber; Mazzini, Chevalley.

Schluein Glion: Mattia Büchler; Laurin Zala (66. Cavegn), Capeder, Coray, Aron Büchler (66. Walter); Ronny Casutt, Rechenbach (61. Afzali), Arpagaus (78. Weishaupt), Deplazes; Caduff (78. Kretz), Lars Zala (61. Vinzens).

Remarcas: Schluein Glion senza Gianluca Casutt, Rafael e Remy Manetsch , Paulin (blessai/reconvalescents), Gienal, Schmid (absents) – Corners: 10:2.