Cun ina clara victoria da 6:1 sequalifichescha Schluein Glion per il miezfinal dil Cup grischun 2025/26 ed astga vinavon sperar da defender il tetel sco victur dil cup cantunal. Domat 2 ha mo pudiu tener petg duront l‘emprema mesadad; tut ils gols ein curdai suenter la pausa.

Naven dall’entschatta ha l’equipa da Schluein Glion dominau il giug e schau mo pauc flad als hosps da Domat 2 da semussar en l’offensiva. Malgrad ch’ils patruns casa han era giu enqual occasiun da marcar in gol ei quei buca reussiu duront l’entira emprema mesadad.

Suenter la pausa ei quei lu beingleiti semidau ed ils attaccaders da Schluein Glion han mussau ch’els san aunc nua ch’ils gols stattan a Crap Gries. Cunzun Lars Caduff ha mussau quei cun vehemenza. Buca meins che quater gols ha el astgau nudar sin siu conto ed aschia procurar per la differenza denter las duas equipas. Ils ulteriurs dus gols han sittau Aron Büchler cun in culp cul tgau sin in siet da cantun ed Laurin Zala cun nezegiar in sbagl en la defensiun dils hosps. Il gol da Domat 2 al 4:1 ei curdaus suenter in siet da cantun entras Sandro Dietrich.

US Schluein Glion – FC Domat/Ems 2 6:1 (0:0)

Crap Gries. – 145 aspectaturs/-as. – AR: Alji

Gols: 53. Caduff 1:0, 68. Aron Büchler 2:0, 72. Caduff 3:0, 74. Laurin Zala 4:0, 78. Dietrich 4:1, 84. Caduff 5:1, 86. Caduff 6:1.

Schluein Glion: Mattia Büchler; Laurin Zala, Coray, Aron Büchler, Walter (74. Weishaupt); Arpagaus (63. Rechenbach), Ronny Casutt, Cavegn, Deplazes (78. Nuno Gomes); Lars Zala (78. Manetsch), Caduff.

Domat 2: Silvio Pfister; Rauso, Matthias Pfister, Durmisi (59. Ansalone), Da Silva (71. Amato); Cédric Sewer, Pozzy, Fahling, Alessio Sewer (71. Reinprecht), Stolz (Damian Sewer); Lars Willi.

Remarcas: Carta mellna: 29. Silvio Pfister (malsportadad). – Schluein Glion senza Afzali, Gianluca Casutt, Paulin (blessai, reconvalescents). – Corners: 5:3.