Per la siatavla gada en seria ei l’equipa da Schluein Glion ida el giug encunter Domat 2 sco victura giu dil plaz, e quei cun ina clara victoria da 6:1. Il resultat havess aunc saviu esser pli clars sche l’equipa da casa havess nezegiau tut sias caschuns da marcar gols.

L’equipa da Domat ha giu naven dall’entschatta mo ina suletta finamira, numnadamein d’incassar aschi paucs gols sco mo pusseivel ed ei perquei serimnada cun tut ses endisch giugadurs en lur atgna mesadad. Aschia ha ella fatg stretg il plaz als attaccaders da Schluein Glion e defendiu lur agen gol entochen bien 20 minutas cun success. En la 21avla minuta ei igl emprem gol per Schluein Glion denton tuttina curdaus. Il goli da Domat ha stuiu schar rebatter in siet da Lars Zala suenter ina attacca sur la vart seniastra e la balla ei setschentada a Lars Caduff avon ils peis che ha sittau ella en la reit. Tgi che ha patertgau che l’equipa da casa fetschi ussa cuort process e decidi il giug cun sittar ulteriurs gols ei vegnius trumpaus. Mo treis minutas pli tard han ils hosps ughegiau da lantschar surprendentamein ina emprema cunterattacca sur la vart seniastra. La defensiun dils indigens ha schau a Marc Da Silva tut il temps da preparar e dar ina flanca, la quala Seya Pozzy ha menau cul tgau en gol. Quei gol ei denton stau mo in cuort intermezzo offensiv dils hosps, silsuenter ein ei puspei seretratgs anavos e han defendiu lur gol. Quei ei era gartegiau entochen cuort avon la pausa. En la 43avla minuta ha Rafael Deplazes astgau sittar in corner naven dalla vart dretga, il goli da Domat ha stuiu schar mitschar la balla sur ses mauns ora, aschia che Gian Luca Coray ha saviu marcar ord cuorta distanza cul tgau. Treis minutas pli tard ei lu schizun aunc il tierz gol per Schluein Glion curdaus. Alla fin d’ina cumbinaziun sur la vart seniastra ha Lars Caduff surviu la balla a Sattar Afzali che ha buca giu breigias da sittar ella sur lingia en.

Suenter pausa ei il giug ius en medema moda e maniera vinavon. Schluein Glion ha attaccau, Domat 2 ha defendiu. Denter la sissont- e siatontavla minuta ha l’equipa da casa decidiu il giug cun treis gols enteifer mo quater minutas definitivamein. Igl emprem ha Sattar Afzali sittau siu secund gol persunal puspei sin pass da Lars Caduff e silsuenter ha Ruben Rechenbach mussau cun in siet plazzau da bunamein 25 meters el cantun bass seniester ch’el posseda in bien siet da distanza. Duas minutas pli tard ha Lars Caduff saviu sittar siu secund gol persunal sin pass da Sattar Afzali. Quei ei stau il davos gol ch’ei ha dau a Crap Gries per l’emprema equipa da Schluein Glion per uonn. Ussa suonda sonda proxima aunc il giug ordvart encunter l’equipa da Gams per finizun dalla prerunda dil campiunadi 2025/26, en la quala igl ei gartegiau cun success al trenader Mirco Zala e ses gidonters d’integrar novs e giuvens giugadurs en l’equipa.

US Schluein Glion – FC Domat/Ems 2 6:1 (3:1)

Crap Gries. – 165 aspectaturs/-as. – AR: Roberto

Gols: 21. Caduff 1:0, 24. Pozzy 1:1, 43. Coray 2:1, 45. + 1. Afzali 3:1, 64. Afzali 4:1, 66. Rechenbach 5:1, 68. Caduff 6:1.

Schluein Glion: Mattia Büchler; Capeder (73. Arpagaus), Aron Büchler, Coray; Vinzens, Cavegn (46. Rechenbach), Ronny Casutt, Deplazes (Cavegn 81.); Afzali, Caduff, Lars Zala (68. Gomes).

Domat 2: Brot; Rauso, Iozzo, Furrer (79. De Luca), Da Silva (72. Dietrich); Cédric Seewer, Pozzy, Ehrler (86. Bojaxhi), Amato; Damian Seewer, Willi (Demirtas).

Remarcas: Cartas mellnas: 80. Cédric Seewer (foul), 87. Demirtas (foul), 88. Caduff (foul). – Schluein Glion senza Gianluca Casutt, Manetsch, Paulin, Walter, Laurin Zala, Weishaupt, Wellinger (blessai, reconvalescents). – Corners: 9:3.