A Crap Gries ha giu liug la sonda vargada il davos derbi sursilvan en tiarza ligia dil campiunadi 2025/26. E l’equipa da Schluein Glion ha era terminau quei quart derbi cun ina victoria e gudignau suenter duas victorias encunter il CB Lumnezia era per la secunda gada encunter il CB Trun/Rabius.

L’equipa da Trun/Rabius che ha mussau en la runda da primavera els emprems siat giugs cun quater victorias, dus remis e mo ina terrada bunas prestaziuns ei vegnida cun optimissem e buna speronza da forsa gudignar puncts a Crap Gries. L’equipa da Schluein Glion che ha gudignau sis dils siat giugs dalla primavera ed ei perquei alla testa dalla tabella ha denton era ina buna confidonza en sesez ed ei buca stada promta da surschar puncts als hosps. Alla equipa da casa eis ei lu era gartegiau dad ir en avantatg en la 16avla minuta cun ina bellezia e sperta cunterattacca. Lars Zala ei vegnius lantschaus sin la vart dretga ed ha surviu la balla immediat a Sattar Afzali che ha menau ella direct sper il davo um vi en la reit. Suenter bien vegn minutas ha Trun/Rabius giu sias meglieras caschuns da marcar in gol. Ton Manuel Da Silva sco era Daniel Lopes han buca reussiu suenter culps libers e la secunda caschun da Daniel Lopes cuort avon la pausa ha il goli dils indigens menau sur la traversa ora. Persuenter ha Sattar Afzali sittau suenter 40 minutas siu secund gol persunal ed aschia alzau il resultat sin 2:0.

Suenter il té – forsa han ils giugadurs era buiu aua freida da pausa, cunquei ch’il sulegl barschava bravamein sil pastget e scheva schizun suar la gronda roscha d’aspectaturas ed aspectaturs sin la tribuna – ha Schluein Glion strusch lubiu als hosps da vegnir malsegirs avon il gol. Persuenter han Lars Zala e Sattar Afzali alzau il resultat enteifer treis minutas sin 4:0. Lars Zala ei vegnius survius da siu frar Laurin naven dalla vart dretga ed ha stuschau la balla ord cuorta distanza en gol. Sattar Afzali ha surmontau Livio Lozza cun in siet da gronda distanza el cantun ault dretg. Vegn minutas pli tard ha Lars Caduff lu priu las davosas speronzas als hops da forsa saver volver aunc il resultat cun sittar sin pass da Jan Kretz il 5:0. Il gol d’honur per Trun/Rabius ei curdaus en la 85avla minuta entras Mathias Flepp. El ha deviau in corner cul tgau en la reit. La finiziun ei quei denton aunc buca stau. El temps supplementar ei Jan Kretz vegnius survius da Ruben Rechenbach el profund ed ha astgau cuorer tut persuls encunter il goli da Trun/Rabius. Siu siet ha il goli aunc saviu bloccar, la balla ei denton setschenda a Lars Zala avon il pei che ha saviu sittar ella en la reit.

Cun quella clara victoria franchescha Schluein Glion siu plaz alla testa dalla tabella. Treis giugs avon la fin ha l’equipa dalla Foppa sis puncts avantatg sin Mels, las schanzas da cuntonscher la promoziun ein pia grondas. Ei suondan ussa aunc ils giugs encunter Triesenberg, Domat 2 (omisdus ordvart) e Gams.

US Schluein Glion – FC Trun/Rabius 6:1 (2:0)

Crap Gries. – 352 aspectaturs. – AR: Schwendener

Gols: 16. Afzali 1:0, 40. Afzali 2:0, 53. Lars Zala 3:0, 56. Afzali 4:0, 75. Caduff 5:0, 85. Flepp 5:1, 90. + 4. Lars Zala 6:1.

Schluein Glion: Mattia Büchler; Laurin Zala, Capeder (61. Cavegn), Coray, Walter (46. Vinzens); Ronny Casutt, Arpagaus, Rechenbach, Afzali (61. Kretz); Lars Zala, Caduff.

Trun/Rabius: Lozza; Wolf, Aurelio Carigiet, Flepp, Elia Schmed; Friberg (72. Enea Decurtins), Pfister (46. Rovin Schmed), Robin Monn (Derungs), Da Silva (63. Andri Carigiet); Caduff (79. Vincenz), Lopes (72. Cathomas).

Remarcas: Cartas mellnas: 36. Capeder (foul), 48. Vinzens (foul), 55. Lopes (foul), 69. Derungs (foul).  – Schluein Glion senza Gianluca Casutt, Deplazes, Rafael + Remy Manetsch, Paulin (blessai/reconvalescents), Aron Büchler (serraus), Gienal, Schmid, Weishaupt (absents); Trun/Rabius senza Bergamin, Duff, Patrizio Decurtins, Jacomet, Orlando Monn, Muoth, Roel Schmed (blessai, absents), Denis Monn (serraus).  – 42. siet en la traversa Schluein Glion (Lars Zala), 70. siet en la petga Schluein Glion (Caduff), 82. siet en la petga Schluein Glion (Lars Zala). – Corners: 9:4.