Il giug denter il capogruppa Sargans e Schluein Glion ei stau il cumbat per la testa dalla tabella dalla gruppa 1 dalla tiarza ligia e per l’emprema gada suenter 15 giugs sto Sargans surschar igl emprem rang ad in autra squadra. E quella squadra senumna Schluein Glion che ha gudignau il giug 2:0. Omisdus gols ein curdai suenter la pausa e suenter sbagls dil goli e la defensiun da Sargans.

L’emprema mesadad ei buca gest stada surcargada cun acziuns offensivas. Omisduas equipas han dau gronda peisa sin la defensiva ed aspectaturas ed aspectaturs han encurschiu ch’ils giugadurs vulevan per tut prezzi buca far sbagls ed aschia forsa possibilitar agl adversari dad ir en avantatg. Aschia ha Schluein Glion giu la megliera occasiun da marcar suenter in siet da cantun, il qual Gian Luca Coray ha menau cul tgau mo per pauc sur la traversa ora. Sargans ha giu sia megliera occasiun suenter in culp liber, ha denton buca saviu nezegiar ina malcapientscha en la defensiun dils indigens per ir en avantatg.

Cuort suenter la pausa ei il giug vegnius lantschaus per da dretg. A Schluein Glion eis ei numnadamein gartegiau dad ir en avantatg en la 51avla minuta. In siet da cantun da Rafael Deplazes ha il goli da Sargans menau sut pressiun en siu agen gol. Ussa ha Sargans stuiu far empau dapli pil giug e sez vegnir pli activs en l’offensiva. Quei ha purtau a Schluein Glion la pusseivladad da lantschar cunterattaccas. Ina da quellas ha mo per pauc buca purtau il secund gol en la 73avla minuta. Il siet da Ruben Rechenbach ei denton rebattius dalla petga. Aschia ei la tensiun stada gronda entochen en la novontavla minuta ed aunc empau pli gitg. Suenter ch’ils hosps han buca saviu marcar cun lur davosa pusseivladad – in giugadur da Sargans ha sittau la balla sper gol vi suenter in sbagl dil goli indigen – ha Tiziano Vinzens decidiu il giug definitivamein en la novontasisavla minuta. El ha profitau d’ina malcapientscha denter il goli ed in defensur dils hops che han surschau ad el la balla e sittar en tutta ruasseivladad il 2:0 e sia equipa sin igl emprem plaz dalla tabella.

US Schluein Glion – FC Sargans 2:0 (0:0)

Crap Gries. – 256 aspectaturs/-as. – AR: Koller

Gols: 51. Deplazes 1:0, 90.+ 6. Vinzens 2:0.

Schluein Glion: Mattia Büchler; Laurin Zala, Coray, Capeder (90. + 3. Walter), Aron Büchler; Cavegn (60. Arpagaus), Casutt, Deplazes, Afzali, Caduff (89. Vinzens), Lars Zala (64. Rechenbach).

Sargans: Kurath; Mathis, Tanner, Wachter, Schai; Alonso (69. Hobi), Roner, Tschai (46. Buchli); Lamm (77. Hofmann), Müller, Zollino (82. Musliu).

Remarcas: Cartas mellnas: 23. Lamm (foul), 34. Coray (Foul), 53. Laurin Zala (foul), 58. Roner (foul), 79. Mathis (foul), 89. Caduff (??). – Schluein Glion senza Gianluca Casutt, Paulin (blessai, reconvalescents), Remy Manetsch (absents). – 73. siet en la petga Schluein (Rechenbach). – Corners: 6:2.