Era sche Schluein Glion ha stuiu giugar l’entira secunda mesadad mo cun diesch giugadurs eis ei gartegiau da gudignar il giug encunter Sevelen. Sche tut las caschuns da marcar fussan vegnidas realisadas fuss la victoria aunc curdada ora bia pli aulta.

L’equipa da Schluein Glion ha puspei recaltgau treis puncts ed aschia cuntonschiu sia finamira, mo igl ei iu vess encunter l’equipa da Sevelen che ha naven dalla biala entschatta sespruau da buca vegnir sut las rodas e da forsa vegnir al success cun ina cunterattacca. Suenter pliras bunas caschuns da marcar ha Ruben Rechenbach procurau en la quendischavla minuta per igl avantatg per Schluein Glion. Naven da bien sedisch meters ha el plazzau siu siet el cantun ault dretg. Mo treis minutas pli tard eis ei gartegiau als indigens d’egalisar. Shasivar Rustemi ei vegnius lantschaus cun in pass el profund ed ha finiu l’attacca cun in siet precis en il cantun ault dretg. Quei gol ei denton staus per liung temps il sulet siet sin gol dall’equipa indigena. La musica el offensiva ha vinavon l’equipa da Schluein Glion fatg ed ella ei en la 24avla minuta era puspei ida en avanttag. Suenter ina flanca en la zona da puniziun ei Lars Caduff staus pli sperts che il goli da Sevelen ed ha menau la balla cul tgau en direcziun dil gol, nua che Lars Zala ha sittau ella sur lingia en al secund gol per ils hosps. Cuort avon la pausa – suenter pliras bunas caschuns da marcar da Schluein Glion – han ils hospitonts lantschau cun ina balla liunga ord la defensiun ina cunterattacca. Il goli da Schluein Glion ha vuliu sittar naven la balla ha denton tuc igl attaccader ed ei perquei vegnius punius cun la carta cotschna. Ord consequenza ha Schluein Glion stuiu giugar il rest dall’emprema sco era l’entira secunda mesadad dil giug cun in giugadur pli pauc.

Vid il decuors dil giug ha quei denton buca midau bia. Schluein Glion ha era en diesch giugadurs dominau vinavon il giug e creau pliras bunas caschuns da marcar. Quellas ein denton tuttas vegnidas munchentadas aschia che Sevelen ha aunc adina sperau da forsa saver egalisar enzaco. Mo las attaccas dils indigens ha la defensiun da Schluein Glion defendiu senza pli gronds problems e cun il tierz gol entras il giuven giugadur Fadri Arpagaus la 75avla minuta decidiu il giug definitivamein.

FC Sevelen – US Schluein Glion 1:3 (1:2)

Schild. – 55 aspectaturs/-as. – AR: Alji.

Gols: 15. Rechenbach 0:1, Shasivar Rustemi 1:1, Lars Zala 1:2, 75. Arpagaus 1:3.

Sevelen: Moreira; Enis Rustemi (79. Jseni), Subendran, Jahiji, Kaurin; Fuoco, Verdicchia, Jsamili (34. Ademi), Lufi; Eljezi (46. Jusufi), Shasivar Rustemi (61. Jsmaili).

Schluein Glion: Mattia Büchler; Laurin Zala (89. Weishaupt), Coray, Aron Büchler, Manetsch (Gienal); Ronny Casutt, Cavegn (71. Arpagaus), Rechenbach, Deplazes; Lars Zala, Caduff (87. Gomes).

Remarcas: Cartas mellnas: 45. Lufi (foul), 50. Shasivar Rustemi (reclamar), 74. Arpagaus (foul), 84. Mirco Zala (reclamar) – Carta cotschna: 45. Mattia Büchler (foul). – Schluein Glion senza Afzali, Gianluca Casutt, Paulin, Walter (blessai, reconvalescents), Capaul, Vinzens, Wellinger (absents). – Corners: 5:10.