Strusch da crer quei ch’ei capitau en las davosas minutas dil derbi denter l’US Schluein Glion ed il CB Lumnezia a Crap Gries. Cun lur emprema acziun malsegira en la secunda mesadad eis ei numnadamein gartegiau als hosps d’egalisar en la 90avla minuta il resultat e tuttina han ei buca saviu purtar in punct a casa.

Mo lein entscheiver davon. Sur dall’emprema mesadad dat ei pauc da rapportar. Schluein Glion sco patruncasa a Crap Gries ha empruau da far il giug ed aschia vegnir al success. Quei ei denton gartegiau mo a mesas, cunquei che l’equipa ha selubiu da dar bia pass malprecis ed ha cuntinuadamein era fatg sbagls da controllar e dar vinavon la balla. Quei han ils hosps dalla Val Lumnezia era provocau cun lur giug agressiv e cun lur veglia d’encurir ils cumbats um encunter um e sche pusseivel d’era da gudignar tals. Tuttina eis ei reussiu a Schluein Glion en la 14avla minuta dad ir en avantatg. Suenter in siet da cantun ei la balla setschentada tier Tiziano Vinzens, siu siet da strusch vegn meters ha il goli stuiu schar rebatter anavon e Sattar Afzali ha stuschau la balla ord cuorta distanza en la reit. Suenter quei gol han ils hosps giu lur megliers muments el giug. Dapli che enqual siet da cantun, ils quals han buca purtau fretg, han els denton buca saviu raccoltar. Aschia ein las duas equipas idas en la pausa cun il resultat da 1:0.

Il generus cumbat da mintga soli giugadur dils hosps ha era cuntinuau en la secunda mesadad. Las forzas da cumbatter ein denton sesminuidas plaun plaunsiu, aschia che Schluein Glion ha surpriu pli e pli il domini dil giug. Finalmein ha l’equipa saviu scaffir enqual caschun da marcar, denton senza reussir. Treis gadas ha il goli dalla Lumnezia, Fabio Casanova, liberau cun miraculusas paradas e treis gadas han ils giugadurs sittau la balla ord ina buna posiziun sur gol ora. Aschia ei schabegiau quei ch’ei descret all’entschatta da quest rapport. En la 90avla minuta ha Lumnezia astgau sittar in culp liber naven dalla vart seniastra en direcziun dil gol dils indigens. La balla rebattida ei setschentada tier Nando Lombris che ha spediu ella cun in siet precis el cantun bass dretg. Suenter quell’egalisaziun dil resultat ha Schluein Glion aunc fiers inagada tut en sia offensiva, senza denton vegnir malsegirs. En la pli davosa minuta ha Ruben Rechenbach fatg danovamein pressiun ed aschia provocau in sbagl dil goli! El ha saviu rubar la balla ad el e sittar il gol dalla victoria. Da star mal per il goli dils hosps!

US Schluein Glion – CB Lumnezia 2:1 (1:0)

Crap Gries. – 325 aspectaturs/-as. – AR: Georgis

Gols: 14. Afzali 1:0, 90. Nando Lombris 1:1, 90. + 3. Rechenbach 2:1.

Schluein Glion: Capaul; Laurin Zala, Coray, Aron Büchler, Walter; Vinzens (61. Cavegn), Ronny Casutt, Afzali (35. Rechenbach); Deplazes, Caduff, Lars Zala.

Lumnezia: Fabio Casanova; Luca Casanova I, Paul Alig, Manuel Casanova, Luca Casanova II; Danilo Blumenthal (68. Pascal Derungs), Andriu Alig, Toni Vinzens, Dario Capaul; Dino Blumenthal, Marc Casaulta (62. Nando Lombris).

Remarcas: Cartas mellnas: 20. Caduff (foul), 43. Manuel Casanova (foul), 91. Ruben Rechenbach (malsportadad). – Schluein Glion senza Paulin (reconvalescents), Gianluca Casutt (blessaus),  Manetsch (absents). – Corners: 12:6.