Encunter il secund davos dalla tabella eis ei gartegiau a Schluein Glion da recaltgar ils emprems puncts dalla primavera. Ils treis puncts ei lu era gest stau il sulet positiv ch’ei dat da menziunar. La prestaziun ei stada fetg mediocra.

Surprendentamein ha buca Schluein Glion surpriu naven dall’entschatta il giug enta maun, mobein l’equipa da Triesen. Ils hospitonts parevan ualti dormulents e buca propi semtgai sin las ballas liungas, cun las qualas ils hosps operavan. Aschia ein ils sperts ed agils attaccaders da Triesen vegni da fugir enqual ga da lur adversaris ed han procurau per scenas malsegiras avon il gol da Schluein Glion. Per ir en avantatg han ils hosps denton duvrau in culp liber naven digl ur dretg dalla zona da puniziun. Il goli da Schluein Glion ha aunc saviu rebatter igl emprem siet cul tgau d’in attaccader, encunter il secund da Mike Almer ei lu era el denton staus senza schanza. L’egalisaziun ei gartegiada alla equipa da casa suenter ina buna mes’ura. In siet da cantun da Ruben Rechenbach ha Aron Büchler sittau anavos ad el. Lez ha surpriu la balla e sittau ella en direcziun dil gol dils hosps, nua che puspei Aron Büchler ha deviau il siet cul tgau en la reit.

Era en la secunda mesadad ei il giug buca vegnius megliers. Bein ha Schluein Glion ussa dominau e strusch schau vegnir ils hosps pli malsegirs en l’offensiva. Ed igl ei lu era gartegiau alla equipa da casa dad ir en avantatg. Ella ha denton duvrau igl agid dil capitani da Triesen, Daniel Salzgeber, per far quei. Tal ha numnadamein deviau in siet da Rafael Deplazes taluisa che siu goli ha buca pli saviu defender la balla. Quei gol ha lu gest decidiu il giug en favur da Schluein Glion. Tut las occasiuns da vegnir malsegirs avon il gol da Triesen han ils attaccaders da Schluein Glion numnadamein ruinau a sesez cun pass malprecis ni diltuttafatg falli.

US Schluein Glion – FC Triesen 2:1 (1:1)

Crap Gries. – 160 aspectaturs/-as. – AR: Curic

Gols: 15. Almer 0:1, 34. Aron Büchler 1:1, 60. Salzgeber (autogol) 2:1.

Schluein Glion: Mattia Büchler; Laurin Zala, Coray, Aron Büchler, Walter; Arpagaus (46. Paulin), Casutt, Deplazes, Rafael Manetsch; Rechenbach (46. Afzali), Lars Zala (74. Rechenbach).

Triesen: Percina; Good, Almer, Salzgeber, Büchel; Pires, Neusüss (72. Lefèbvre), Miler (18. Mirarchi, 46. Matt), Fejzaj (69. Memeti); Carroccia, Preite.

Remarcas: Cartas mellnas: 17. Salzgeber (reclamar), 53. Carroccia (53. Foul). – Schluein Glion senza Gianluca Casutt, Vinzens (blessai, reconvalescents), Caduff (serraus), Remy Manetsch (absents), Schmid, Gienal, Weishaupt (engaschament cun in autra equipa). – 38. siet en la petga Schluein (Lars Zala). – Corners: 6:3.