Aspectaturas ed aspectaturs han viu mesjamna sera in giug sco biars a Crap Gries, cura che l’emprema da Schluein Glion dat a casa. L’equipa scaffescha biaras occasiuns da marcar mo vegn buca da nezegiar quellas, aschia ch’igl adversari po – quella gada eis ei stau Walenstadt – sperar entochen alla fin da forsa aunc engular in ni treis puncts.

L’equipa da Walenstadt ei denton naven dalla bial’entschatta buca sezzupada. Ella ha empruau dad era baghegiar si il giug e cun ina pulita purziun agressivitad han ils giugadurs purtau dabia direzzia sil plaz, quei ch’ei vegniu acceptau digl arbiter. Cun la quarta fetg buna caschun eis ei lu denton tuttina gartegiau a Schluein Glion dad ir en avantatg. Suenter ina sperta attacca sur la vart seniastra ha Rafael Deplazes alzau la balla cun ina flanca precisa sil tgau a Laurin Zala che ha ord cuorta distanza sittau igl emprem gol.

Cuort suenter il té da pausa ha igl arbiter fatg surstar la gronda part dils presents cun schular e mussar sil punct da penalti suenter in cumbat en la zona da puniziun dils hospitonts. Marc Menzi ha nezegiau la caschun ed egalisau il giug. La risposta da Schluein Glion ei suandada mo tschun minutas pli tard. Puspei ha l’equipa attaccau sur la vart seniastra, Rafael Deplazes ha lantschau Lars Caduff profund, il qual ha surviu la balla cun in pass travers a Lars Zala che steva tut persuls avon gol ed ha strusch saviu far auter che sittar la balla en la reit. Tier quei resultat eis ei restau entochen alla fin era sche Schluein Glion ha aunc giu enqual buna caschun da marcar ed era sche Walenstadt ha en las davosas minutas fiers tut en l’offensiva ed empruau entochen alla fin d’egalisar.

US Schluein Glion – FC Walenstadt 2:1 (1:0)

Crap Gries. – 180 aspectaturs/-as. – AR: Senti

Gols: 39. Laurin Zala 1:0, 48. Menzi 1:1 p., 52. Lars Zala 2:1.

Schluein Glion: Capaul; Laurin Zala, Coray, Aron Büchler, Manetsch (46. Walter); Arpagaus, Rechenbach (46. Cavegn), Ronny Casutt; Deplazes (90. + 2. Nuno Gomes), Caduff (72. Afzali), Lars Zala (90. Weishaupt).

Walenstadt: Jäger; Gulli, Patrick Loop, Doyen, Nicola Loop; Cecchini, Karisik, Qehaya; Tomaselli, D’Agostino, Menzi (65. Skoric).

Remarcas: Cartas mellnas: 42. Menzi (fou), 48. Capaul (reclamar), 66. Laurin Zala (foul), Büchler (foul), 90. + 2. Weishaupt (foul). – Schluein Glion senza Gianluca Casutt, Paulin, Vinzens (blessai, reconvalescents). – 14. siet en la traversa Schluein (Lars Zala), 57. siet en la traversa Walenstadt (Patrick Loop). – Corners: 7:1.