El davos giug da campiunadi per questa sesiun a Crap Gries ha Schluein Glion mussau ina fetg fleivla prestaziun e spiars meritadamein encunter la secunda equipa da Mels. La quala ha cun la victoria segirau siu plaz en tiarza ligia.
Bia possess dalla balla munta buca dominar il giug. Quei han ils giugadurs da Schluein Glion stuiu sentir sonda vargada encunter l’equipa da Mels 2. Bein han els schau circular la balla dad in tier l’auter, mo il bia en la atgna mesadad e senza saver crear enzatgei malsegir en l’offensiva. Aschia ha l’equipa da casa giu en l’entira emprema mesadad strusch ina buna caschun per sittar in gol. Mels 2 che ha aunc ner basegns duvrau puncts per mitschar definitivamein dalla relegaziun ha cumbattiu per mintga balla e mintga meter pastget e giu la cuida d’ir en la 25avla minuta en avantatg. Suenter che igl arbiter ha schulau suenter in’intervenziun dil goli da Schluein en la zona da puniziun e mussau sil punct da penalti, ha Marco Wildhaber nezegiau la caschun e marcau cun in siet segir el cantun bass.
En la secunda mesadad ein las attaccas da Schluein Glion vegnidas empau pli decisivas. Finalmein eis ei gartegiau da far suar empau il goli dils hosps, il qual ha denton mussau ina buna prestaziun e duas gadas deviau dus siets malsegirs cun bravura en corner. Aschia eis ei buca gartegiau all’equipa da casa da far in gol en las entiras 90 minutas. E co gi il proverbi: tgi che fa buca ils gols, survegn els! Ed aschia eis ei vegniu. En la 71avla minuta ha Marco Wildhaber astgau sittar in culp liber ord la distanza da bien 20 meters. Cun in siet plazzau ha el nezegiau quel per marcar siu secund gol ed aschia decider il giug en la favur dils hosps.
US Schluein Glion – FC Mels 2 0:2 (0:1)
Crap Gries. – 125 aspectaturs. – AR: Senti
Gols: 25. Wildhaber 0:1 p., 71. Wildhaber 0:2.
Schluein Glion: Mattia BĂĽchler; Laurin Zala (77. Remy Manetsch), Coray, Aron BĂĽchler, Walter (62. Derungs); Gomes (64. Sgier), Ronny Casutt, Vinzens (64. Rafael Manetsch), Bundi (64. Holderegger); Lars Zala, Caduff.
Mels 2: Hardegger; Hermann, Ackermann, Wildhaber, Bigger; Bartholet, Michael Tschirky, Eberle, Joel Tschirky (67. Schlegel); Walser (80. Novoa), Giordano (58. Kobler).
Remarcas: Cartas mellnas: 13. Giordano (malsportadad), 70. Aron Büchler (foul), 80. Caduff (foul), 83. Sgier (foul). – Carta mellen/cotschna: 88. Caduff (foul). – Schluein Glion senza Gianluca Casutt, D’Atria, Deplazes, Paulin, Pool (blessai/reconvalescents), Afzali, Bearth (absents). – Corners: 6:3.