Avon ina gronda fuola d’aspectaturas ed aspectaturs spiarda Schluein Glion igl emprem giug da campiunadi cun in gol differenza. Quei havess denton buca exnum stuiu esser. Naven dalla trentavla minuta han ils indigens numadamein teniu bein pètg als favorits da Mels e schizun giu dapli caschuns da sittar gols, donn che ni ina ni l’autra da quellas caschuns ei buca vegnida nezegiada.
E donn che l’equipa trenada da Mirco Zala era suenter ina mes’ura gia dus gols en disavantatg. L’equipa da Mels ch’ei vegnida relegada dalla secunda ligia e vala sco favorit per la promoziun, ha dominau alla entschatta e nezegiau ch’ils indigens cun ina media da vegliadetgna da bien 20 onns han duvrau in mument da sesanflar sco equipa. En la16avla minuta han ils hosps cun far pressiun sin la defensiun saviu recaltgar ina balla amiez il plaz e lantschar immediat Luca Bleisch en l’ala dalla vart dretg. Lez ha surviu la balla a Kevin Willi che steva persuls avon il gol e ha aschia saviu marcar il 0:1. Diesch minutas pli tard ha in culp liber da liunga distanza purtau il secund gol per Mels. La balla puspei sittada da Luca Bleisch ha numnadamein anflau il tgau da Marco Kohler che ha spediu ella en la reit.
Quei secund gol ha svegliau l’equipa indigena che ha ussa era entschiet ad agir pli detschartamein ell’offensiva. E quei ha purtau fretg! En la 38avla minuta ha Lars Zala reconquistau ina balla suenter in siet rebattiu e sittau igl emprem gol cun in siet bass el cantun seniester. Mo ina minuta pli tard havess il medem giugadur saviu egalisar il resultat. Siu emprem siet ei denton vegnius bloccaus d’in giugadur sin la lingia da gol e siu secund siet en la medema acziun ha munchentau il gol mo per millimeters. Cuort avon pausa ha Laurin Zala giu la balla dall’egalisaziun sil pei. Siu siet ei denton ius en la reit dalla vart dretga dil gol enstagl da gol en.
Da pausa ei lu il caposettagols dalla tiarza ligia digl onn vargau, Lars Caduff, vegnius sil plaz e mo duas minutas pli tard havess el bunamein sittau siu emprem gol. Mo il goli da Mels ha deviau siu siet cul tgau cun in bien reflex en corner. Schluein Glion ha surpiu en la secunda mesadad pli a pli il domini dil giug; in gol ha denton buca vuliu gartegiar. Pliras caschuns ein vegnidas munchentadas dils inidgens, aschia ei capitau encunter la fin dil giug quei che capeta savens el ballapei, numnadamein: tgi che fa buca ils sgols survegn els. En la 82avla minuta ha in attaccader da Mels disturbau e bloccau in culp naven dil gol, la balla ei curdada a Kevin Willi avon ils peis che ha stuschau ella ord distanza sper Flurin Capaul vi en gol. En las davosas minutas ha Schluein Glion lu fiers tut anavon, per dapli ch’in secund gol entras Lars Caduff cun in siet d’endisch metters suenter ch’el era vegnius mess a tiara, ha ei denton buca tunschiu. Donn, l’equipa cun in giugadur da sedisch onns, in da gisiat onns e quater ulteriurs giugadurs da sut ni da vegn onns ha mussau ina buna prestaziun. Quei lai sperar per igl avegnir.
US Schluein Glion – FC Mels 1a 2:3 (1:2)
Crap Gries. – 310 aspectaturs. – AR: Mumm
Gols: 17. Kevin Willi 0:1, 26. Marco Kohler 0:2, 38. Lars Zala 1:2, 82. Kevin Willi 1:3, 90 Lars Caduff 2:3 pen..
Schluein Glion: Capaul; Laurin Zala, Coray, Holderegger, Walter (83. Afzali); Arpagaus, Cavegn (68. Vinzens), Ronny Casutt, Afzali (46. Caduff); Deplazes (65. Rechenbach).
Mels 1a: Rissi; Mullis (57. Prisset), BĂĽsser, Lymann, Kohler; Aliji (89. Good), Bartholet, Willi (90. Ackermann), Bleisch; Suljejmani (74. Kalberer), Ackermann (57. Schlegel).
Remarcas: Cartas mellnas: 64. Aliji (foul), 74. Laurin Zala (foul), 79. Bleisch (foul), Ronny Casutt (foul). – Schluein Glion senza Paulin, (reconvalescents), Gomes, Manetsch (absents). – Corners: 10:6.