Da gronda calira – schizun aspectaturas ed aspectaturs sin la tribuna suavan da mordio – ha Schluein Glion mo dus gis suenter la victoria el final dil Cup grischun era gudignau encunter il club da Sevelen.
Mo igl ei iu vess ed ei ha puspei duvrau danovamein perseveronza e la veglia da tut ils giugadurs da vuler gudignar ulteriurs treis puncts. Els han fatg frunt al sulegl che ha scaldau bravamein l’arena a Crap Gries ed emblidau las strapazzas dil final dil cup e dalla fiasta da campiun. Ils giugadurs da Sevelen ein seretratgs naven dall’entschatta en lur mesadad e han surschau als hospitonts da far il giug. Lezs han empruau da construir caschuns da marcar, mo quei ha funcziunau mo a mesas. La megliera caschun ha Lars Caduff giu en la trentavla minuta, siu siet ha il goli denton menau en la petga e da leu ei la balla rebattida en ses mauns. Sevelen ha cuort avon pausa giu la schanza dad ir en avantatg suenter in siet da cantun, el davos mument ha la defensiun indigena denton saviu sittar naven la balla.
La secunda mesadad ha purtau il medem maletg: Schluein Glion en possess dalla balla, Sevelen en sia atgna mesadad spitgond da saver lantschar ina u l’autra cunterattacca. La decisiun en favur dils indigens ei curdada en la 71avla minuta entras il pli giuven giugadur sil plaz, Rafael Manetsch. El ei vegnius lantschaus el cantun dretg dalla zona da puniziun e ha cun in siet precis el cantun bass seniester sittau siu emprem gol per l’emprema equipa dall’US Schluein Glion. L’equipa da Sevelen ch’ei fermamein involvada el cumbat encunter la relegaziun ha buca saviu reagar sin quella frida. Anzi, bien diesch minutas pli tard ei era aunc il 2:0 curdaus entras Lars Caduff. El ei vegnius spedius cun ina balla en la profunditad, ha nezegiau sia spertadad e cuntonschiu la balla cuort avon il goli, menau ora tal e saviu sittar la balla el gol vit.
US Schluein Glion – FC Sevelen 2:0 (0:0)
Crap Gries. – 115 aspectaturs. – AR: Mavroudis
Gols: 71. Rafael Manetsch 1:0, 83. Caduff 2:0.
Schluein Glion: Mattia BĂĽchler; Holderegger, Coray, Derungs, Walter; Sgier (75. Aron BĂĽchler), Ronny Casutt, Vinzens (59. Laurin Zala), Bundi (59. Rafael Manetsch); Lars Zala (73. Gomes), Caduff.
Sevelen: Sazimanoski; Verdicchia (89. Vetsch), Ziörjen (57. Fuoco, 79. Bega), Licci; Lorik Jahiji, Aliji, Kaurin, Altin Jahiji, Fuoco (54. Ismaili), Subendran (82. Ziörjen); Martins (67. Puopolo).
Remarcas: Cartas mellnas: neginas. – Schluein Glion senza Gianluca Casutt, D’Atria, Deplazes, Remy Manetsch, Paulin, Pool (blessai/reconvalescents), Afzali, Bearth (absents). – 30. petga Schluein Glion (Caduff), 57. petga Schluein Glion (Caduff). – Corners: 9:5.