Lumnezia muossa efficienza, Schluein Glion perseveronza e gudogna
Avon la biala culissa da varga melli aspectaturas ed aspectaturs el stadiun da ballapei niev sin la Obere Au a Cuera ein il CB Lumnezia e l’US Schluein Glion semiserai d’Anceinza el final dil Cup grischun. Suenter in dir cumbat sur 120 minutas ha Schluein Glion gudignau cun 5:3 gols ed aschia gudignau il buccal per la quarta gada en sia historia.
Il giug ha entschiet en fetg bein per Schluein Glion. Gia en la tiarza minuta eis ei gartegiau als favorits dad ir en avantatg entras Lars Zala. Igl attaccader ha defendiu la balla encunter siu defensur e battiu il goli cun in siet precis el cantun liung ord in anghel ualti spitg. Era suenter quei gol ha Schluein Glion dominau e mo per pauc munchentau d’augmentar il resultat gia en igl emprem quart ura. En la siatavla minuta ha il goli da Lumnezia, Fabio Casanova, che ha mussau egl entir giug ina fetg ferma prestaziun, deviau in siet da Ronny Casutt cun ils pézs da sia detta en la petga ed era aunc bloccau il secund siet dil medem giugadur bravurusamein. En la dudischavla minuta ha Tiziano Vinzens sittau la balla ord cuorta distanza mo per pauc sper gol vi suenter ch’el haveva giu cuglienau cun ina fenta siu adversari e steva tut persuls avon gol. Suenter quei furioso ha Schluein Glion piars empau il slonsch, aschia che il club dalla Lumnezia ei era vegnius d’iniziar enqual attacca. En la 26avla minuta ha l’equipa da Marco Blumenthal astgau sittar siu emprem siet da cantun ed ella ha nezegiau quel per egalisar il giug. Andriu Alig ha deviau la biala flanca da Dino Blumenthal cul tgau en la reit. Ed otg minutas pli tard eis ei aunc vegniu meglier per il CB Lumnezia. Igl arbiter ha numnadamein taxau ina intervenziun dil goli da Schluein Glion sco foul e schulau in penalti. Matias Alig ha nezegiau la caschun e sittau cun il secund siet sin gol il 2:1.
Suenter la pausa ha l’equipa dil trenader Mirco Zala puspei augmentau empau la cadenza e fatg pressiun sin la defensiun dalla Lumnezia. Quei ha purtau beingleiti fretg. En la 52avla minuta ha Tiziano Vinzens surviu la balla a Lars Zala cun ina biala flanca naven dall’ala dretga sil tgau ed il giuven attaccader ha menau tala en la reit. Silsuenter han omisduas equipas entschiet a sentir empau l’aura steppa, aschia ch’il giug ei vegnius pli plauns. Schluein Glion ha vinavon empruau da crear scenas offensivas, quei denton senza gronda fantasia e perschuasiun e l’equipa dalla Lumnezia ha defendiu il resultat cun grond engaschi e sperau ch’ina cunterattacca porti forsa la victoria. Quei ei denton buca stau il cass e cunquei che Schluein Glion ha en las davosas tschun minutas aunc munchentau duas bunas caschuns da marcar entras Lars Caduff e Gian Sgier ha ei dau ina prolungaziun.
Tala ha entschiet grondius per Lumnezia. Suenter treis minutas ha la defensiun centrala da Schluein Glion buca dumignau da liberar ina balla liunga ed ha stuiu schar mitschar Yanick Demont persuls encunter gol. Il caposettagols dalla Lumnezia ha nezegiau quei cun saung freid e sittau il 3:2. E cuort mument pli tard havess el schizun saviu sittar il quart gol per sia equipa. Siu siet ord in anghel fetg git ei denton ruschnaus mo per pauc avon lingia da gol vi enstagl da gol en ed ha aschia saviu vegnir liberaus. Ils giugadurs da Schluein Glion han ussa denton mussau perseveronza ed han aunc inagada alzau la pressiun sin la defensiun digl adversari. En la 99avla minuta ha in culp liber purtau all’equipa dalla Foppa l’egalisaziun entras Gianluca Coray che ha deviau la flanca da Sattar Afzali cul tgau en la reit cun siglir pli ad ault che tut ses adversaris. La decisiun definitiva en favur da Schluein Glion ei lu arrivada en la secunda mesadad dalla prolungaziun, cura che la forzas dall’equipa dalla Lumnezia han schau suenter pli e pli fetg. Dus gols, igl emprem entras Serafin Bundi ch’ei vegnius survius da Lars Caduff e ha sittau la balla volley en la reit ed il secund entras Gian Sgier che ha canunau in culp liber naven dalla lingia da puniziun cun tutta forza sper il mir e davos um vi da gol en, han purtau la victoria. Il CB Lumnezia ha mussau in grond cumbat e dabia efficienza, Schluein Glion ha bucau schau luc e la finala giu il pli liung flad per decider il giug en la prolungaziun. Allas aspectaturas ed als aspectaturs – per la gronda part dalla Surselva – ha il giug segir plaschiu. Ellas ed els han viu in giug cun dabia gols e dabia cumbats naven dall’emprema entochen la 120avla minuta, tgei vulan ins dapli. E tgi che ha aunc buca viu tut exact ni ha buca saviu esser a Cuera per mirar il giug live, sa mirar igl entir giug ni mo la scenas principalas sin rtr.ch. Bien divertiment.
CB Lumnezia – US Schluein Glion 3:5 (2:1; 2:2)
Obere Au. – 1100 aspectaturs. – AR: Rechsteiner
Gols: 3. Lars Zala 0:1, 26. Andriu Alig 1:1, 34. Matias Alig 2:1 pen., 52. Lars Zala 2:2, 93. Yanick Demont 3:2, 99. Coray 3:3, 110. Bundi 3:4, 116. Sgier 3:5.
Lumnezia: Fabio Casanova; Luca Casanova, Manuel Casanova, Toni Vinzens, Capaul; Andriu Alig (86. Collenberg), Matias Alig (111. Andriu Alig), Dino Blumenthal (58. Pascal Derungs), Gion Alig (66. Danilo Blumenthal), Mauro Demont (91. Gion Alig); Yanick Demont.
Schluein Glion: Mattia BĂĽchler; Laurin Zala, Coray, Aron BĂĽchler (50. Livio Derungs), Walter; Bearth (50. Afzali), Ronny Casutt, Sgier, Vinzens (64. Remy Manetsch); Lars Zala (72. Bundi), Caduff (117. Rafael Manetsch).
Remarcas: Cartas mellnas: 33. Mattia Büchler (foul), 98. Sgier (foul), 103. Collenberg (foul). – Carta mellen/cotschna: (115. Collenberg) – Schluein Glion senza Gianluca Casutt, D’Atria, Deplazes, Paulin, Pool (blessai/reconvalescents), Capaul, Gomes (absents). – 7. petga Schluein Glion (Ronny Casutt). – Corners: 3:6.